ဗြဟ္မစိုရ်အသင်းကြီးသည် မန္တလေးမြို့၏ နာရေးကူညီမှုအသင်းကြီး ဖြစ်သည်။ ၁၉၉၈ မေ ရ ရက်နေ့မှာ ဗြဟ္မစိုရ် လူမှု ကူညီရေး အသင်းကို မန္တလေးတွင် စတင် ဦးဆောင် ဖွဲ့စည်း ခဲ့သည်။ တောင်စလင်း ဆရာတော် ဦးတိက္ခက ကျောင်းဝင်း အတွင်း ပေ နှစ်ရာ ပတ်လည် မြေကွက်ကို အသုံးပြုခွင့် ပေးသဖြင့် အသင်း၏ နေရာဌာန ဖြစ်လာသည်။ ဆရာတော် ဦးတိက္ခသည် ၎င်းအသင်းတွင် နာယက အဖြစ် တာဝန် ယူသည်။ နဒီ မြန်မာ ဦးအောင်ခိုင်၊ ဒေါ်ညိုမီ မိသားစုမှ နာရေးယာဉ် တစ်စီး လှူဒါန်းပြီး၊ နာရေး ကူညီမှု အပိုင်းမှာ အသားကျ လာသည့် အခါ ကျန်းမာရေး ကူညီမှု များကို ၂ဝဝဝ ခုနှစ် ဧပြီလ ၄ ရက်နေ့မှစပြီး ကူညီပေးခဲ့သည်။ စတင်တည်ထောင်ရာတွင် လူထုဒေါ်အမာလည်း နာယက အဖြစ်နှင့် ကြည့်ရှုလမ်းညွှန်ပေးခဲ့သည်။ အခမဲ့ နာရေး ကူညီမှု အပြင် ငွေကြေးမတတ်နိုင်သည့် လူနာများအား ဆေးရုံစရိတ် ငွေကြေးထောက်ပံ့ခြင်း၊ ယခုအခါ အသင်းမှ ဆေးခန်းဖွင့်လှစ်ပြီး အခမဲ့ကုသမှု ပေးခြင်းများလုပ်ဆောင်လျက်ရှိသည်။ ယခုကဲ့သို့ ဆေးကုခန်းမဖွင့်မီက ဆေးရုံတွင် တက်ရောက်ကုသလျက်ရှိပြီး ငွေကြေးမတတ်နိုင်သည့် လူနာများအား တရက်လျင် ကျပ် ၂သိန်းနှုန်းဖြင့် ကူညီခဲ့သည်။ လွန်ခဲ့သည့် ၂နှစ်ကျော်က ဆေးရုံဆောက်ရန် မြေနေရာ ကိုအလှူရှင်တစ်ဦးက လှူဒါန်းခဲ့သော်လည်း အစိုးရက ဆောက်လုပ်ခွင့် မပြုသဖြင့် ဆောက်လုပ်နိုင်ခြင်းမရှိပဲ ဆေးကုခန်းသာ ဖွင့်လှစ်ပြီး ကုသပေးလျက် ရှိသည်။ အထက်မြန်မာပြည်တွင် အဆိုပါ အသင်း၏ လုပ်ဆောင်မှုများမှာ ထိရောက်မှု အတိုင်းအတာ တစုံတရာ အထိကြီးမားပါသည်။ အကျိုးခံစားခွင့် ရရှိနေသည့် လူဦးရေ အတိုင်းအတာ အတိအကျ မသိရှိရသေးပေ။ ဗြဟ္မစိုရ် အသင်းကို လက်ရှိတာဝန်ယူလုပ်ကိုင်နေသူများမှာ ဥက္ကဋ္ဌ ပါမောက္ခ ဒေါက်တာ ဒေါ်ငြိမ်းငြိမ်း ဖြစ် ပြီး ဦးမောင်မောင်သာ သည် အတွင်းရေးမှူး အဖြစ်တာဝန် ထမ်းဆောင် နေ ပါသည်။